قصيدة وين صبح للشاعر كاظم اسماعيل الكاطع

- وين صبح ..؟
- مدري والله ...بليل مظلم فاركَيـــــته
- وين مسه ...؟
- من طلع ماسد وراه الباب
لكن بالدرب هم بمشيته
- دوره ...؟
- كَتلك مالكَيته
- شوف كَلبك...
- جان كَبل سنين بيته
- شوف صدرك ...؟
- يكره المصدور ريته
- شوف ضلعك ..؟
- مثل عود العنب يابس وايست منه وطويته
- دوره ..؟
- كَتلك مالقيته
- ليش عفته ...؟
- اعطشت مره وما سكاني ... وعطش مره وما رويته
- شوف صندوك الاسرار
- بدون رزه
وكل حجي البيهن حجيته
- شوف عينك ...؟
- ماكو بيها
- شوف عينك..؟!!
- جان بعيوني .... وبجيته ...


من اشهر قصائده
أحــــــاول...

أحاول
وبمحاولتي
نهايه الـــ قصتج وقصتي
تسأليني على جروحي ...؟
وسبب كل الجروح انتي

*

احاول للسؤال الكًــــــــــه
جواب بدفتر الفركَــــــــه
تعدت ساعة الملكَـــــــــــه
بعد شيفيد عاودتي ...؟

*

احاول اكتم اسراري
وضم اوراقج بناري
وإذا صح للعشك شاري ...؟
أبيع شلون ما بعتي

*

أحاول اجمع اوراقي
واعيش بعمري الباقي
نديمي السهر ...
والساقي
كلام احجيته بصمتي

*

صحيح آني انتهيت وياج
لكن ... منتهت قصتي
اسأل والسؤال انتي
وجاوب والجواب انتي



ايضا ....
حالات ...

ولا جنك يكَلبي بكَلبك النار
ولا جنك ثلج من عاشرت نار
خلص عمر المواسم والنياسين
وظل بس
الغنه الصامت ... والاسرار
نام
وصبح الناعور مشلول
لا ... ماي النهر يصعد للشفاف
ولا بيه حيل يكَدر حيل يندار
جان الفرح عدنا طير محبوس
ولكَـــــــه فرصه وتعلكَ بالسما .... وطار
ولا جنك يكَلبي فوك الارماح
معلكَ... خلصت عمرك بالاسفار
ومادامك يكَلبي فوك الارماح
ولا عندك حبيبه
ولا الك دار
شيفيدك لو تجر كل المواويل
شيفيدك لو تردد كل الاشعار
شيفيد ...!!
تمر نهر بولايه مهجوره
شيفيد ... !!
تمر محابس بيد مبتوره
شيفيدك ....؟؟
يا .... يول
يا كافي ... يا كَلبي
تظل مثل الارض يوميه إلك ...دوره
وشمتانيه الروح ...؟
وبعدها متانيه ...؟
واسنين تكَضي من العمر
كل ... ثانيه
واحلام ياخذها الدمع كل مشوار
وبيوت ياخذها المطر كل مشوار
وانت ...؟ !
انت يكَلبي تعيش للحين
ولا جنك ثلج ومعاشر النار
آنا وياك خلينا غريبين
سولتنا الجكاير... والصبر زين
وبليل الشته يصير الحزن ...حار
دافي ياحزن
للفاركَ اثنين
صاحبته وشبابه انكتلوا ازغار
آنا وياك خلينا غريبين
نحلم بالحبيبه ... وعتبة الدار
وإذا شفتك يكَلبي ... بيوم فرحان
هذا اول عتاب
وآخر
إنذار


واخيرا قصيدة
يصبرني ....

يصبرني ... المايدري بقصتي ...
ويكَلي تهون
عشره وشيبت بأولها
وتاليها شلون ..؟ !
ينسيني ...؟
من هو ...؟ ينسيني
انطيه ... الباقي من اسنيني
وآنا الممنون
يصبرني وماتسوى يكَلي
هو شمدريه ..؟
لو نار الشبت بضلوعي
تتحول بيه
يمكن يتركني بأحزاني
وما يسأل شمغير الواني
كل ساعه بلون
يداويني
المايعرف علتي ...
شيفيد دواه ...؟
راحوا لبعيد وما رجعوا
خلوني اهناه
هنيالك يالكَلبك خالي
ما تدري شصاير بحوالي
هم اليدرون
يصبرني المايدري بعلتي
ويكَلي تهون

منقول عن
ديوان نعش النهر

مشكور اخوي الشاعر محمد العيساوي

استمعت بقراءتها
دام نبض قلمك لنا

تحياتي
د. السيد عبد الله سالم