جم طفل ضل ينتظر جيت ابوه يعود
وجم ام تعد بصبر تعد وبنفسهه تجود
وجم حرمه الترملة بذيج الليالي السود
وجم اخ يتاني يرد جيت اخو مفكود
وتنطرينه شكثر شبان عدنه ورود
فرهدهه حزب البعث يالتحجي عالفرهود
ومن طاح ذاك الصنم كلنه الأمل موجود
أخوتنه باجر ترد باجر ترد اردود
ولن صوت يصرخ غضب يامن تدور عود
اخوتكم بلا رحم صارو طعم للدود
لا تعتب اعله المضه باب العتب مسدود
لأركاب كل الخلك جان الحبل ممدود
****** ****** ********
بعيوني شفته أمس وكحل بجيته العين
وشميت بيه الوفه وطيبت هلي الطيبين
ها خويه كتله هله شهل الغيبه صار سنين
اشلون ليلك كضه وخلصت عمرك وين
تبسم اخوي وبجه وصب دمعه عالخدين
كال آنه طيف وجذب بعينك امر الحين
حي ودفني البعث بالواحد وتسعين
يا طيف كتله انتظر وخليني اسمعك زين
ورايد اعرف السبب كال الاسباب اثنين
واحد احب الوطن والثاني احب حسين
يا طيف وبيا كتر دليني مدفونين
جر حسره من الكلب ودك راسه بالجفين
كال العراق انترس من العراقيين
الي انعدم والي اندفن والاف متشردين
كلهه اعله حب الوطن لهل الوطن متطوعين
غالي علينه الوطن بي سته معصومين
بدمنه اشترينه الوطن وبدمنه متوسمين
تروح الرجال وتجي ويالحك عليهه البين
بس دين عدنه وزلم ردنه التوفي الدين
هالكاع كاع الشرف متريد بعثيين
هالكاع كاع الصدر كاع اليوالي حسين
يا طيف وين البقو ذيج الزلم عدلين
ذيج الشباب المشت يا طيف راحو وين
مارد عليه وسكت وما حرك الشفتين
بعيوني مات الحلم ذكرته بالميتين
محمد العيساوي
موضوع: طيف من المقابر الجماعية 
الخميس يونيو 21, 2007 2:23 am
