يا سر الوجود الما تدركة عقول
واعقول البشر قط ما تصل حدك
اذا يوم الكلافة وتبجي عالخانوك
والخانوك كلهة تحاشمت ضدك
شريدن عنك اكتب يا عمود الدين
مولاي القلم خجلان من عندك
نسمع بالمجد والتضحيات هواي
بس المجد يسجد لو يمر مجدك
تاريخك بطولة وهيبة يا مولاي
اذا انت الرسول المصطفى جدك
تاريخ الينكرك اني اكفر بيه
واحركنة حرك لو يرفض يخلدك
انت اصل الوجود وهاي ما يحتاج
يوكف يختلف بيهة الوكف ضدك
يا كعبة صمود العقل بيك احتار
بين اعداك واكف سيدي وحدك
ولا مهتم ابد من شاهدت آلاف
وانصارك كظوا محد يجي يسندك
يا ضنوة علي المايسكت اعلة الضيج
بساحات الوغة من يكدر يردك
هذا انت الحسين الماتطخ الراس
اشما تعلة الخصم ما تكدر تصدك
وخذوا منك عزمهم صحبتك مولاي
وصفوا مثل النجوم الزاهية جندك
يا سد الاسلام وبيك ظل مامون
خسران وعلي الما يدخل بسدك
وي يعقوب اقيسك ظلم تنعد هاي
اذا هو وية يوسف لايذ بجبدك
وانت بكل تفاني قدمت لله
قرابين بدماهم قدمت ولدك
ولا دمعك نزل من فاركتهم دوم
واظن تزاعلن دمعاتك وخدك
ولو ادري الاحبة فراكهم مولاي
وكسر ظهرك يبو الطيبات ويظهدك
ولكنك بقيت بكبريائـــــــــــــــــــك دوم
وصعدت اعلة المجد مو هو اللي يصعدك
وآني ادري الحرب ترفضهة يا مولاي
ويعم دوم السلام اعلة البشر ودك
ولاطبع التخاذل من طباعك دوم
وترفضهة الكراسي من تجي تنشدك
ما اقارن ابد بينك وبين اعداك
هذا انت الجبل والوادي اللي يضدك
وتظل انت الحسين اشما تمر سنين
موجود بكلبنة ونندب الفكدك
موضوع: الى سيد الشهداء عليه السلام 
الجمعة يوليو 20, 2007 3:05 pm
