ما مجبور اصيرن مثل هذا وذاك
وامشي براي هذا وذاك ما اتبعه
شاعر واكتب شما بيه من وجدان
والوجدان غصبا عنك تسمعه
اعرفك زين اعرفك وادري بيك شبيك
موش اني الغشيم الماعرف ربعه
اني ابن الصريفه وطيبة الجرداغ
وربات المضيف وهيبة الربعه
ولا اني العليه شما تريد تكول
ولا حجيك ينزل الربك يرفعه
درس متعلم اني بمدرسة عاشور
ثوب عليه وافي ومو سهل نزعه
حريه وكرامه وغيرهن ماريد
ويطك النكرهن مية الف وجعه
افزع من تطيح بحيلي اكوم وياك
واعرف من جنابك ما تصح فزعه
واصيرن كنطره وتعبر عليه لناس
اذا بالناس اشوفن ضاكت الوسعه
هذا اني الرضعته من الثدي المبخوت
وشب عليه ضميري من اول الرضعه
صح تشوف شكلي بعينك زغيرون
وتضن ما يميز ضره من نفعه
بس ما تدري بيه انه اشكبرني عليك
يا معذور اعذرك لوصرت سلعه
ولو وطرني وكتي اثكال يابو اثكال
وصكعات الوكت صكعه باثر صكعه
بس ما طاطات راسي وكلت ممنون
ومدوخ زماني بصبري ومجزعه[center]