نار × نار
روحي نار ...!
وطيبتي جدمين عمري ما تعرف الوكفه يوم
تركض وتسحكني دوم
لأن عدهه الوكفه عار
روحي نار ...!
وصبري ظي شمعه تبده بجف نهار
وجلمتي دموعي
وضوه عيوني انتظار
ولي صار :
صار كلي يلوذ بيه وبيه كلي يلوذ صار
وحفريت اخدود عزمي من صرت بدموعي اطفي النار
واني ادموعي نار
روحي نار ...!
وحته جفي الفزعيته خيط اشفافه وتحير
ما عرف ياخذ قرار
وكمت أشوف ابذني واسمع بالعيون
واني مسرج كوني واصرخ كون و اطشر شرار
وصرت سجه امش عليه
بلجن اوصل يوم اليه
وخاف اتيهه اشلون بيه
وخايف ابقه وظعني سار
روحي نار
وخلصت ايامي بصيام
والوكت يمطر ظلام
وانه حالي ..
نخله بجبود الصحاري احلم الكه بيوم جار
وبختصار
عشت داخل كلبي غربه
وما كضت وياي حربه
وحرت بيهه وبيه حار
روحي نار .. ! والوكت مر وجزاني
واني من اني اني اعاني
ولسه اعاني ولسه احس بروحي نار
روحي نار ...! وكمت اشوف الراح جاي والي يحضر كله مار
روحي نار ... !
والوكود ايام عمري شما أعيش أشبع دمار
روحي نار ...!
وكمنه ناكل في بعضنا
وبمضيف العقل من رحنه وفرضنه
قرر وتقريره جائر
لا سلام ولا فرار
حيدر كشمر الزيادي