رايتك يبن العسكري

رايتك يبن العسكري تنشرهه يا يوم
بالاه تهتف شيعتك والكلب مهظوم
اتنادي بالاه يا غيرة الله
رايتك يبن العسكري تنشرهه يا يوم
______________________________________________________
بلهفه يبن الحسن نهتف كوم شوف شصار بينه
الحملت افكـــار السقيفه بالفتن صــــــارت علينه
جي نكول الوالي حيــــدر وغيره ما نقبــــل ولينه
تجمعت اهـــــل الظلاله وبالفتن بلـــــــوه بتلينه
راونه انواع الفــــــــتن والحرب عالشيعه اعلنت
ننخاك يا شبل الحســــن من غيابك كوم لينـــــــه
________________________________________
ننخاك جرد صارمك وانهض يموعود
بيك الامل يا سيدي للشده معكود
اتصيح ويلاه يا غيرة الله
رايتك يبن العسكري تنشرهه يا يوم
________________________________________

كوم وانشر راية الحق يـا بقـــية الهاشمــــيه
واكصد السامره وانظر الفاجعه بهاي المسيه
فجرو مرقد الهادي وتدري انت بهاي القضيه
واسكت اسكت لاتسولف خاف تصبح طائفيه
مولاي ظل بيك الامل معلك يبن خير العمل
لاناكه شفنه ولا جمل من الحكومه الجعفريه
________________________________________

مولاي ملينه الصبر يا صاحب الثار
وبعيونك انته شاهدت يا سيدي الصار
الهم حملناه يا غيرة الله
رايتك يبن العسكري تنشرهه يا يوم
________________________________________


يا بقية اله ندعي لطلعتك ذيج البهيه
وتحكم بحكم الجليل وتنشر لحق بالبريه
الظلم يالمهدي ولانه وبعد ما نحمل اذيه
الهدما بيتك يغايب الباقيه من اذناب اميه
من جيل لاخر ينولد هذا الحقد باهل الحقد
هيهات للذله نمد جفنه احنه العفريه
________________________________________
وياك احنه عالعهد والعهد ملزوم
جا يمته يبن العسكري يا سيد تكوم
جم هظم عشناه يا غيرة الله
رايتك يبن العسكري تنشرهه يا يوم
________________________________________








يا بو صالح عتب عدنه والعتب ردنه تسمعه
ونشتكيلك من هظمنه ودمعه تشكي الحال دمعه
بالحزن عشنه بغيابك والعمر يا المهدي شمعه
يمته نسمع ذاك صوتك والحزن ثوبه ننزعه
كل يوم ننطر صيحتك ملهوفه ضلت شيعتك
بلهفه نتاني طلعتك ننتظر يا المهدي فزعه
________________________________________

وينك يبن خير العمل يا صاحب الثار
اتحاشمت ضد شيعتك مولاي الاشرار
ها الوعد نتناه يا غيرة الله
رايتك يبن العسكري تنشرهه يا يوم
________________________________________

اكصد السامره وانظر كبر ابوك وكبر جدك
تفجر بفكر الوهابي وهالخبر مولاي عندك
تصيح شيعة علي وينك وين يالموعود وعدك
نجمعت اشرار البريه كلهه هذا اليوم ضدك
كوم انهض وشوف الكبر مهدوم بعد اشتنتظر
يالمهدي ملينه الصبر عاليضدك وين ردك
________________________________________


مولاي ملينه الصبر الصبر جم دوب
للهضم والهم والحزن ما ضلت كلوب
شخصك ندبناه يا غيرة الله
رايتك يبن العسكري تنشرهه يا يوم
________________________________________

طالب الحاجه يغايب يكصد البيت اليكرمه
وماكو اكرم من نسبكم وانتو من الله نعمه
اليكصد السامره يشكي لعلي الهادي ويحجي همه

تنكضي يم الضريح الحاجة من يروح يمه
عكب القبر يبن الحسن يا سيدي نكصد لمن
ضكتنه مولاي المحن الفرج منكم نلزمه
________________________________________

كلبك يملزوم الوعد ما خلص صبره
وياك ردنه سيدي نكصد الكبره
انعيش ذكراه ياغيرة الله
رايتك يبن العسكري تنشرهه يا يوم

الشاعر : محمد العيساوي