العقيلة زينب وأمير المؤمنين عليهما السلام

بويه بويه الليله وحدي ابين امية
بويه بويه وينه ليــــث الغاضريه
شلون اگضي خلافه ليلي وين ابو الغيره ﭽفيلي

وين الي كفل خدري واجيت وياه
هم يدري شجرالي من عگب عيناه
وين الي يگول الوعد ما انساه
منته السلمتني يا علي بيمناه

بويه بويه گلبي ﭽن حس بمصابه
بويه بويه طول عليه بغيابـــــــــه
بغيبته تصوب دليلي وين او الغيره چفيلي

لعد صوب النهر لمن ﮔصد عباس
انخطف لوني يبويه والدليل انحاس
حمل جوده وتعنه صاحب النوماس
ما يرجع علينه ﭽن دليلي حاس

بويه بويه الگمر راعي الشهامه
بويه بويه اندعي يــــرد ابسلامه
ودعيته ومات حيلي وين ابو الغيره ﭽفيلي

گمر هاشم يبويه سلوة عيوني
شگل للناس عنه من يسئلوني
ابو الغيره چفيلي وبي يسموني
اخت عباس كلگومي يلقبوني

بويه بويه الگمر طاهــــــــر حليبه
بويه بويه المثله بويه منين اجيبه
سلوة عيوني وخليلي وين ابو الغيره جفيلي






يبويه شلون باجر من تگلي الناس
يازينب چا وينه البطل عباس
شگلهم طاح اخوي الي يشيل الراس
وعگب عيناه ضلينه ابلا حراس

بويه بويه شحچي لو سئلوني عنه
بويه بويه بعيني دمعه بگلبي ونـــه
تسمع صياحي وعويلي وين ابو الغيره جفيلي

قسم بالله لو سالم يرد لينه
الگمر عباس سبع الگنطره العينه
ومن عگبه يشوف الي جره بينه
بهذا الحال ما ظنه يخلينه

بويه بويه ماله يمنه ولاله يسره
بويه بويه أني بس بهاي اعذره
لو يصير اطيته حيلي وين ابو الغيره جفيلي