الحسين ثار الله

الحسين ثأر الله
الشاعر محمد العيساوي

انته ثار الله ووليه وسره بيك
وبيك تممهه الرساله الخاتمه
يلي صبرك حير اصحاب العقول
ويلي حبك يطفي نار الحاطمه
يبقه نهجك نور للدنيه وامان
وبس ضمير الواعي نهجك قيمه
يا أبي ومنك تعلمنه الاباء
يالعبرة بعزتك بحر الضمـــه
حاشه ماذليت ياسبط الرسول
عالاباء الروح دوم معلمـــه
لاكلت انته بوجه كل الطغاة
وجف عدوك مارضيت اتسالمه
ياسفينة نوح يافلك النجاة
جم عرش طاغوت نهجك حطمه
دين جدك بيك يحسين استغاث
يمن عزمك من عزم حامي الحمه
ومن نظرة الدين محتاج النصير
صرة نار اعله الجموع الظالمه
تدري بالكوفه وطبعهه وباليصير
وتدري بالعاشر تثير الملحمه
وقدمت اهوه وبنين ويالصحاب
وكربله صارت بحر من الدمـه
ومن طحت يحسين هزيت الجبال
وعرش ربك ونحنت حتى السمه
وسهم جبدك ياشفيع المذنبين
بصدر كل الشيعه يحسين انرمـه
لسه اسمك يرهب كلوب الطغا ة
واليحبك كلهه ضده محزمـــه
حسبو بعاشور موتك ياحسين
وفكرو نهجك فكرهم يبرمــه
وحسبو تموت الرساله من تموت
مادرو نهجك بدمك راسمـــه
ومادرو نهجك يظل منهل علوم
واليروم بزود منه تعلمــــه
وما درو لاجلك خلك الله الحياة
وانته ليك الهادي يحسين انتمــه
ثورتك ثورة شرف يبن الرسول
وبيهه بشر طه بأول مقدمـــه
شلون ننسه مصابك وننسه الطفوف
والقيامه لاجل يومك قائمـــه
انته ابن حيدر علي وابن البتول
يعني شخصك مايريد الترجمه
ويبقه نهجك مدرسه بكل العصور
وقنبله بدرب الجموع المجرمه