حمد صوت الضمير الما يلجمه الجام
شسولف عن حمد وشتكدر تسجل
حمد من الطفوله سنين عشت وياه
حمد غير وكرامه بكلهه متكمل
حمد غيرة وشهامه وبالشدد معروف
حمد صوته يجفل الخيل من تصهل
حمد نخوة عمامه وما يعرف الخوف
ابو نفس الابيه الماقبل بالذل
حمد ثورة وعقيد وربعه تحلف بيه
حمد راسة عزيز وما قبل ينزل
حمد غدروه غفله وليله اظلم جان
والناطور غافي ونار ما مشعل
حمد تنطر خواته يعود صار سنين
وكلب امه الحنين معلعل تعلعل
حمد امه تكضي اليل بالحسرات
ومن نجم الصبح تكعد دمعهه يهل
تصيح فراش عرسك جبته يالعريس
وتريد اختك ييمه بعرسك تهلهل
ها يبني تعال الحك بكايه الروح
نهد حيلي ييمه وفركتك تكتل
انه الردتك ذخر يبني التوالي الشيب
وللحمل الثجيل بميلته تعدل
بأمل جيت حمد جانت تعد ايام
ومن ذاك الصبر ما ايست وتمل
وعكب ذاك الصبر ومجابس الدمعات
وبالطيف اليمر تتوسل توسل
لن حتى الامل حزب البعث ذبحوه
والقبر الجماعي صار كل بكل
ولن حتى البواجي واللطم ممنوع
وممنوعة الفواتح كالو الذجرة
وصبينه الدمع ويم حمد بسكوت
وكتبو عالدمع حزب البعث كفره
ومن كالو لكو جثت حمد مدفون
وجيلات الغدر مترصعه بظهره
اجت امه امس تركض وره التشييع
وركضت عالنعش وتلكته بنظره
لنهه عظام شافت مالكت عريس
وصاحت عالنشامه الشالته بحسره
مأجورين يمه هالنعش تمثيل
بس ابني اريدن اوصل الكبره
اريد وليدي اشمه ومنه اشبع شوف
وبخدوده اريدن امسح العبره
اريد انصب مناحه والطم عالراس
اريد اجعد حمد وانصب عزه بكتره
واريد اهل الضمير تحاسب الجتال
وتكله بيا ذنب متوسد الغبره
لعنه اعله البعث والي تعلك بيه
وكل بعثي تجره وكابح العتره
الشاعر
محمد العيساوي
موضوع: حمــــــــــــد 
الخميس يونيو 21, 2007 2:57 am
