قصيدة سعد للشاعر امين ابو غربان ورد الشاعر منهل هادي ابوبياد

قصيدة سعد

وهذه القصيده للشاعر امين ابو غربان بصيغة رسالة لوالدته

سعد بلغ أهلنا الخير بكبال / الصبر كلهم على الله يعاود الراح
سعد بلغ أهلنا العدن ثكال / واضن خبث الليالي البي خطر راح
سعد كلهم لهسا براسه العكال / عزيز وماتمايل يوم ماطاح
سعد كلهم المهره تريد خيال / ولا هرش اليسدي بغير سباح
سعد من توصللهم شيد باالحال / سعد كلهم بأمأن وحيل مرتاح
سعد وأقره لهلنا أرجوك موال / وشرط كون البداية تكول يا صاح

يا صاح وكتي لعد كلبي بناره ويه
وشعندي حس حشمت عينً ولامً ويه
كوم انتخيلي تره مالي ويه الذل ويه
هل ماتجيرن وهل ماتنتخيلي وهل
ترضاهه ليه اضل ماليه دار وأهل
ماجنت اضنن يهل بفراك أهلنه وهل
يا حيدر أهلال اشد من فتنه روح ويه

سعد هاي الحقيقه الكون تنكال / الضلام يريد كلهم نور مصباح
وتصل للوالدة البروح تنشال / لوالدتي الأصل والأصل سباح
سعد من توصللها ويمه ترتاح / تبوس جفوفها وتعرف الحاله
تكلها الصبر دوج الصبر مفتاح / وتسلم بيدها هاي الرسالة


وقد عقب الشاعر منهل هادي ابو بيادر بهذه القصيده


سعد كال التريده وسرنه ماكال / وبشرك من اجانه ولسه الافراح
سعد سولف عليك وبين الحال / ودرينه ابيرغك لساع ماطاح
سعد بالغ بذجرك والدمع سال / ماخله سعد مدفون ماباح
سعد جابك بجفه وحطك كبال / عين امك وماضل جفن ماناح
سعد عمر فرحنه ورض العيال / وحطينه الكلب والروح شوشاح
سعد جانه يغني بأحلى موال / كزبر كل جلد من صاح يا صاح

ياصاح انه جيت عاني معتني ياهلا
حامل بشارة فرح يا من نده ياهلا
يا حيدر انهض نخاك من البعد يا هلا
غيرك يبو حسين منهو الينتخي للندب
حبكم ذنبنه ولو ماحبكم ماندب
لديار غربه التخلف بالضماير ندب
وانجان ماتنتخي ياهو البعد جاه اله


سعد بس ماوصلنه تهشر ومال / لتراب النسحكه وشمه وناح
شاف الوالدة ودمع الفرح سال / راد يبوس اديها والزعل لاح
سعد كالنة يبني البعد جتال / وهو المنكم يجيني يرد الأرواح
سعد ردتك تضل للدوم خيال / على ضهور المعانج دوم لواح
سعد بالك تطخ الراس مازال / نفس عدك وتكله وبيدك سلاح
سعد هلت هله بزود العكال / اريدن يضل بيرغ فوك الأرماح
سعد خلي الفراك ونرضه لاطال / ماطول الذراع تجسر ولاح
سعد من توصل ابني وعندك وشال / من دمعك تهده بعبرته وساح
تفك سدره وتحبه بشوك شلال / من عالي وكع وتطشر وراح
كله الروح عندك والجسم ضال / وخلافه صبرنه خلافك شباح
يهل ان شاء الله بملكاك الهلال / وترد الكاع اهلنا تصير فلاح

نقل من مدونة الشاعر منهل هادي ابو بيادر
mhf52.maktoobblog.com