خاب المافرح هاليلة مجنون *** دمع أفراح صبت مني العيون
يبن العسكري أهنانه *** حاضر أنته ويانه
تكتب عالگلب أسم اليحبون
************************
(1)
فرحـــــان الگلب هاليلة ميلاد ...
ظل بيك الأمل وأتعيد الأمجــاد ...
ميلادك يظل بعيون الأحقـــــاد ...
شوكة من الجدود لحد الأحفاد ...
شمسك عالبشر نور وسعادة *** فدوة نروح أحنه لهل ولادة
يم حسين وأنصاره *** راح أتهني زواره
كل اللي مشوا لجلك يوافون
(2)
ياشبل الصميدة ورفعة الراس ...
نهديلك مشاعر وأجمل أحساس ...
تدري الروح حبك ألهه نبراس ...
وأتذوب بغرامك هايمه الناس ...
دم البينه يهتف بسمك اليوم *** أنته أجمل أمل بالدنية مضموم
يصرخ كل گلب وينه *** نورك كلنه تانينه
لجلك سالت أدموم اليزورون
(3)
كل گلب اليحب هاليلة فرحان ...
ياآخر إمام ونور الأكوان ...
يالعايش أمل وبكل الأزمان ...
بس بمولدك تنسانه الأحزان ...
تدري لخاطرك مانبخل الروح *** كل الناس فدوة لجيتك أتروح
صدگ كل محب بينه *** ظلت عالدرب عينه
شوف أنصار شخصك هل يتانون
(4)
ياصوت العدالة وفرحة الدين ...
مجبورة بغيابك تشبح العين ...
ماملينه حبك طول السنين ...
ونجدد عهد يم مرقد حسين ...
كلنه انزور جدك نوصل أهناك *** كعبة ومن نطوفن كلنه وياك
باب الجنة مفتوحه *** لليهوه ونذر روحه
فدوة لمولدك كلهم يروحون
(5)
ننتظرك تجي وتعدل المال ...
وبسيفك تگص رگاب الأنذال ...
بس أنته التگف وإتحاسب العال ...
أسلامك نزف وإتبدلت احوال ...
حبك بالدمه وسط الشرايين *** ياحامي الشريعة وناصر الدين
موشمعة العلگنه أظلوع *** نشعلهن بدل الشموع
چم مليون بسمك هل ينادون
(6)
مايهدة المحب يتمنى يلگاك ...
وإيعيش السنين التبگه بحماك ...
ياسيف الولاية وكلنه ننخاك ...
يمته وننجمع كل أحنه وياك ...
أسمك بالگلب ياهو اليشيله *** وكلمن ينكرك يخسر دليله
أنته الجنة معناها *** يمك كلنه نلگاها
أنته الباب ألهم من يدخلون
موضوع: خاب المافرح .................. 
الأحد سبتمبر 23, 2007 4:39 pm
